கல்யாணமாகி நாலு வருஷம் ஆகியிருக்குமா :)

  அன்பார்ந்த வலையுலக உறவுகளே !
                       தேன் எடுத்தவன் வாயும் ,பொடுகுத் தலையன் கையும் சும்மா இருக்காது என்பதைப் போல ,உங்கள் அன்பு வேண்டுகோளுக்கு இணங்க ,மீண்டும் பால் காய்ச்சிவிட்டு இரண்டாம் இன்னிங்க்சை தொடங்கி விட்டேன் ,வழக்கமான உங்கள் ஆதரவை நல்க வேண்டுகிறேன் :)
                                                                                                                  அன்புடன் ,
                                                                                                                  பகவான்ஜி 

சிலர் பொறுமையைச் சோதிப்பதால்....:)
                    ''எவ்வளவு நேரம் வேண்டுமானாலும் யோசியுங்கள் ,ஆனால் அதற்கு ஏற்ற இடம் இதுவல்லன்னு எங்கே எழுதிப் போடச் சொல்றீங்க ?''

                     ''நம்ம ஆபீஸ் லெட்ரினில் தான் !''

எதுக்கு நேரம் அதிகமாகும் :)            
               ''நான்  டிரஸ் சேஞ்ச்  பண்ணிக்கிட்டு வெளியே  கிளம்புற  நேரத்திலே காப்பி கேட்கிறீங்களே  ..இப்போ பாலைக் கொதிக்க வைச்சா ,பால் 'ஆடை கட்டி' கொதிப்பதற்குள்  போதும் போதும் என்றாகி விடுமே  !''
                  ''நீ 'ஆடைகட்டி ' வருவதற்குள் எனக்கு போதும் போதும் என்றாகிவிடுமே !''

மன நோயாளிகளின் எண்ணிக்கை கூட இவரும்தானே காரணம்  :)
                  ''மன நோயால் பாதிக்கப் பட்டவர்களுக்கான தொண்டு அமைப்பை தொடங்கி உள்ளாராமே ,அந்த நடிகை ?''
                  ''விசுவாசமுள்ள நடிகை ,தன் ரசிகர்களுக்காக  நல்ல காரியம் பண்ணியிருக்காரே !''

மனைவியின் அர்ச்சனைக்கு 'அது' தேவையா :)
           ''குலம் கோத்திரம்  தெரியக்கூடாதுன்னு ஜாதகம்  பார்க்காம கல்யாணம் பண்ணியும் புண்ணியமில்லாமப்  போச்சா ,ஏன் ?''
           ''வீட்டிலே எனக்கு தினசரி அர்ச்சனை நடந்துகிட்டுதானே இருக்கு ?''

சர்க்கரை நோய் இருந்தா இப்படியும் ஒரு வாய்ப்பு !
             ''உங்க ஸ்வீட் ஸ்டால் கடைக்கு எப்படிப்பட்ட ஆட்கள்  வேலைக்கு வேணும் ?''
            ''அவங்களுக்கு கண்டிப்பா சர்க்கரை நோய் இருக்கணும் !''

உங்களுக்கு அந்த 'ஞானி 'ஞாபகம் வர்றாரா :)           
              '' நீங்களுமா , கலிகாலம்  நடக்குதுன்னு  சொல்றீங்க ?''
               ''ஆமா , 'வார்த்தை ஜாலங்களால் மட்டுமே ஒருவன் அறிஞர் , ஞானி என்று கலிகாலத்தில் அழைக்கப் படுவார் 'னு பாகவதத்தில் சொல்லியிருப்பது சரியாத்தானே  இருக்கு !''

நடிகையின் அன்றைய அழகு ,மீண்டும் வருமா :)            
         ''அந்த  குண்டு நடிகை கஷ்டப் பட்டு 18 கிலோ எடையைக் குறைச்சிட்டாங்களாமே  ?''
       ''வயசுலேயும் 18 வருசம் குறைஞ்சா நல்லாயிருக்கும் !''

மனைவியான பின்பும் மறக்காத மசால் வடை !
            '' எதுக்குமே சிக்காத எலி ,அந்த ஹோட்டல் மசால் வடைக்கு மட்டும் மாட்டும்னு எப்படி உறுதியாய் சொல்றே ?''
              ''காதலிக்கையில் , அந்த ஹோட்டல் மசால் வடையைத் தின்னுட்டு ,இப்போ நானே  உங்ககிட்டே மாட்டிக்கிட்டு முழிக்கிறேனே !''

'வீடியோ காலில் 'தெரிந்த அழகு முகத்தை ...!
              ''செல்லுலே பார்க்கும் போது அம்சமா இருக்கீங்கன்னு சொன்னேன் ,அதுக்கு  தலைவர் 'வைடா போனை 'ன்னு கோபமா கத்துறாரே,ஏன்  ?''
              ''அவர் ஜெயில் செல்லுலே இருந்ததை கிண்டல் பண்றதா நினைச்சுருப்பார் !''

கணவனிடம் இவ்வளவு முன் ஜாக்கிரதை தேவையா ?
    நான் கைக்குத்தல் அரிசியை தின்று வளர்ந்தவன் என்பதை ...
    ஒரு பேச்சுக்குக்கூட சொல்லமுடியவில்லை என்னவளிடம் ...
   'அதுக்காக உங்க கை நீட்டலையும் ,குத்தல்பேச்சையும் சகிச்சுக்க    மாட்டேன் 'என்கிறாள் !

சாப்பிட்டால் போகுமா ,படித்தால் போகுமா சுகர் :)
              ''என்ன சொல்றீங்க ,முப்பது நாவல் படிச்சும் சுகர் குறையலையா ?''
              ''சுகருக்கு நாவல் நல்லதுன்னு  நீங்கதானே சொன்னீங்க டாக்டர் !''  
கல்யாணமாகி நாலு வருஷம் ஆகியிருக்குமா :)           
           ''என்னடி சொல்றே ,குண்டான உன்னை உன் வீட்டுக்காரர் கிண்டல் பண்றாரா ,எப்படி ?''
           ''ரூபாவதிங்கிற என் பெயரை ரூப அவதின்னே சொல்றாரே !''

இவர்  நல்லபடியா டிஸ்சார்ஜ் ஆவாரா :)
      ''டாக்டர் ,எனக்கு ரொம்ப கஷ்டமா இருக்கு !''
       ''எது ?''
       ''நர்ஸை நீங்க மட்டும் சிஸ்டர்னு சொல்ல மாட்டேங்கிறீங்களே !''

தலைவருக்கு தெரிஞ்சதெல்லாம் அதுதானே :) 
           ''கோவில் விழாக் கொடியேற்ற ,அரசியல்வாதியைக் கூப்பிடக் கூடாதுன்னு சொன்னேன் ,கேட்டீங்களா ? ''
          ''என்னாச்சு ?''
          ''அவர் ,தன் கட்சிக் கொடியைத்தான் ஏத்தணும்னு பிடிவாதமா இருக்கார் !''

பெண்ணைப் பெற்ற புண்ணியவான்களே,ஜாக்கிரதை :)
     காவல் இல்லையென்றால் ...
     காய்ச்ச மரம்கூட கல்லடி படும் 
     கன்னிப்பெண் கண்ணடி படுவாள் !

நோய் வராதா ,பக்கத்திலே எந்த நாயும் வராதா :)
             ''சாப்பாட்டில் அதிகமாய் பூண்டைச் சேர்த்துகிட்டா எந்த நோயும்  பக்கத்திலே வராது ,இதிலே உங்களுக்கு என்ன கஷ்டம் ?''
           '' எனக்கொண்ணும் கஷ்டமில்லை டாக்டர்  ,என் பக்கத்திலேதான்  யாரும் வர முடியாம போகும் !''

பழக்க தோஷம் விடாது :)     
            '' தற்காலிக வேலை நீக்கம் பண்ணின பிறகும் ,  ஆபீசுக்கு  ஏன்  வர்றீங்க ?''
             ''வீட்டிலே தூக்கம் வர மாட்டேங்குதே !''

மாமியாருக்கு அடின்னா ,தாங்கிக்க முடியாத மருமகள் :)
            ''அங்கே  லாரியில் அடிபட்டு கிடக்குறது உன் மாமியார் போலிருக்குன்னு ,போய் பார்னு சொன்னா ...என்னாலே தாங்க முடியாதுன்னு சொல்றீயே ,அவங்க மேலே அவ்வளவு பாசமா ?''
             ''அட நீ வேற ,அவங்க என் மாமியாரா இல்லேன்னா ,வர்ற ஏமாற்றத்தை என்னாலே தாங்க முடியாதுன்னு சொல்ல வந்தேன் !''

கணக்கு உதைக்குதுன்னா எதுக்குத்தான் லாயக்கு ? 
             ''என் பையனை கழுதை மேய்க்கக் கூட லாயக்கில்லைன்னு ,ஏன் சொல்றீங்க சார் ?''
             ''இப்ப கணக்கு உதைக்குதுன்னு சொல்றவன், அப்பவும் கழுதை உதைக்குதுன்னு சொல்வான் போலிருக்கே !''

Tweet